கருங்குளம் ஸ்ரீ பரநாச்சியார் பதிகம்.

கருங்குளம் ஸ்ரீ பரநாச்சியார் பதிகம்.

ஓம் சக்தி! ஓம் சக்தி! ஓம் சக்தி! ஓம்!
ஓம் சக்தி! ஓம் சக்தி! ஓம் சக்தி! ஓம்!

சித்திர விதானமுடன் திருமதில் கோபுரம்,
தேவி நீ நாடவில்லை!
செய்பிழை யாதெனிலும் உய்திதருவாய் அன்றிச்
சிறிதேனும் கோபமிலை!

பக்தியொடு நின்பாதம் பாடுவேன்! பாடுவேன்!
பக்கம்வா, வா, அன்னையே!
பல்கும் கருங்குளம் மல்கவளர் சக்தியே
பரநாச்சி தேவி உமையே! 1

பெருகிப் புறப்பட்ட நதியின் அலை தாலாட்டப்
பெட்டியில் வந்த பெண்ணே!
பேர்கொண்ட கண்மாயில் ஊர்வந்து கொண்டாடப்
பிறை சூடி நின்ற பொன்னே!

பருகிவரும் நீரும் என் பசிதீர்க்கும் சோறும் உன்
பரி வல்லவோ அன்னையே!
பல்கும் கருங்குளம் மல்கவளர் சக்தியே
பரநாச்சி தேவி உமையே! 2

எங்கள் குலம் காக்கும் ஈஸ்வரியும் அல்லவோ!
என்னம்மை நீ யல்லவோ!
எதுநான் விழைந்தாலும் இந்தா! எனத்தரும்
ஈடற்ற தாயல்லவோ?

பங்குனியில் செவ்வாயில் பொங்கலோடு புரவியும்
படைப்போம் உனக் கன்னையே!
பல்கும் கருங்குளம் மல்கவளர் சக்தியே
பரநாச்சி தேவி உமையே! 3

கொட்டி குதித்தாடும் கும்மியிம் குரவையும்
கோதையே உனதுயோகம்!
குதிரைகள் வரிசையும் வனிதைகள் கவிதையும்
கூறும் சஹஸ்ரநாமம்!

பட்டுப் பாவடை மலர்மொட்டுப் பூவாடையின்
பரிமளம் கமழ் அன்னையே!
பல்கும் கருங்குளம் மல்கவளர் சக்தியே
பரநாச்சி தேவி உமையே! 4

பூக்கட்டும் கரகத்தில் பின்முகம் காட்டுவாய்
புகையில் பகை போக்குவாய்!
பொன்கட்டும் பயிரிலே மணிகட்ட நன்றாகப்
பொலி கட்ட விளை வாக்குவாய்!

பாக்கட்டும் நாவினால் பாவாய் உனைக்கட்டப்
பாடினேன் நலம் ஆக்குவாய்!
பல்கும் கருங்குளம் மல்கவளர் சக்தியே
பரநாச்சி தேவி உமையே! 5

மாதா உனைப்போற்றும் மைந்தர்கள் வைரமணி
மகுடபதி செல்வநாதர்!
வருவார்தம் பசிதீர ஒருவாய் கொடுத்தாலும்
மண்ணிலே அவர் குபேரர்!

பாதார விந்தமே பற்றுவேன்! பற்றுவேன்!
பரம கல்யான நிதியே!
பல்கும் கருங்குளம் மல்கவளர் சக்தியே
பரநாச்சி தேவி உமையே! 6

முத்து முத்தான தமிழ் மூவாத செந்தமிழ்
மொய் குழல் உனது தமிழே!
மொகு மொகுவென வண்டுகள் மொய்க்கும் மணம் தங்கும்
மூடி இல்லாத சிமிழே!

பத்தினிகள் காவலாய் சுற்றி வரும் உத்தமி
பாலகன் எனக்கும் அருளே!
பல்கும் கருங்குளம் மல்கவளர் சக்தியே
பரநாச்சி தேவி உமையே! 7

அன்னாய் என் வெற்றிகள் அத்தனையும் உன்னுடைய
அருளால் கிடைத்த வெற்றி!
அதிகாரம் செல்வங்கள் மனைமாதர் மக்களும்
அடியேன் புரிந்த பக்தி!

பதினாறு பேறுகள் தரும் தேவ தேவியே!
படைதாங்கி வருக சுற்றி!
பல்கும் கருங்குளம் மல்கவளர் சக்தியே
பரநாச்சி தேவி உமையே! 8

மஞ்சளொடு குங்குமம் மங்கலம்! மங்கலம்!
வண்ணமலர் மாலை தீபம்!
வாயூறும் பானகம்! மதுரம் மனேகரம்!
மனிகள் குலுங்கும் நாதம்!

பஞ்சமும் நோயும் வராது பரிபலிப்பாய்!
பற்றினேன் உனது பாதம்!
பல்கும் கருங்குளம் மல்கவளர் சக்தியே
பரநாச்சி தேவி உமையே! 9

திருவாக்கும் சக்தியே! தீராதவல்வினை
தீர்க்கும் மகா சக்தியே!
தேகத்தில் வாக்கில் என் சித்தத்தில் ஜீவனில்
திகழும் பரா சக்தியே!

பரயோக சிவஞான சக்தியே! சக்தியே!
பாடுவேன் உன் வெற்றியே!
பல்கும் கருங்குளம் மல்கவளர் சக்தியே
பரநாச்சி தேவி உமையே! 10

அருட்கவி கு,செ.இராமசாமி.